ثورة بنات.....رأي بنت

ثورتى ضد كل إنسان فاكر نفسه وصي عليا ، ضد كل شخص فارض رأيه وأفكاره العقيمة ، انا ثورتى ضد المجتمع ، انا ثورتى ضدك

أحد القضايا الهامة : تسفيه رأي البنت انتى بتطلبي حريتك غلط ، انتى بتفكري غلط ، انتى وخداها قفش ، اسم الله عليك انت الدكر الفاهم؟

فكرة سيطرة الرجل ع المرأة ، جاية من انه اقوى منها جسديا ، ومن هنا فرض وصايته عليها أب أخ زوج ، كلهم مرضى بياخدوا اكتر من حقوقهم

الوصاية باسم الدين ، الدي كان أحد الأسلحة اللى تم تحريف استخدامها لقمع المرأة رغم انها حرة في كل الأديان ، محدش هيتحاسب بدالها

من صفات الإنسان انه خطااء ، أى أنه كثير الخط ، فامتحطنش سيادتك في خانة الألهة والملائكة اللى مبيغلطوش واللى الغلط لهم جريمة !

 الحياة مواقف ، سيبنى اغلط واتعلم من غلطي أحسن ما تخليني انفذ الصح عن عدم إقتناع وعن تقليد أعمى ،، أنا إنسان

ربنا فرق في العقاب يوم القيامة بين راجل وست ؟؟ ، كذلك الحال في الدينا حقي اغلط واتعلم انت مش وصي عليا ، ربنا هيعاقبنى مش المجتمع

البنت تروح المدرسة محنية الظهر لانها خايفة حد يشوف علامات البلوغ على جسمها ، دا بيتسبب في مشكلة في العمود الفقري بسبب الانحناء

 انا بقى كبنت ، من حقي أحرر مجتمعي من الأفكار المتخلفة اللى عمرها ما هتودينا غير في ستين داهية ومصممة اكمل ثورتى بثورة اجتماعية

جنس غلبان ، لو اتحجبنا نبقى سافرات ، اتنقبن نبقى سارقات ، ، ولو مشينا بشعرنا نبقى عاهرات ، قولى امتى يامجتمع هتتغير ناحيتي ؟

 لبسي حرام حواجبي حرام ، كلامى حرام مشيي حرام ، كله حرام حرام ،/ مكنش الهدف ديني بقدر ما كان هدف قذر للإنقضاض على حقوق المرأة

 انا لا بعادي الإسلام ولا الأديان ، بس انا كبنت مش خطيئة ومش فتنة عمال على بطال ، عنيا فتنة وايدي فتنة وصوتي فتنة ، هتقتلونى ؟