السواق والعجوز

بعد ازمه السولار التي لم تدم طويلا اتجه بعض الناس الى استغلال البعض الاخر اسوء استغلال،فلقد رأينا محطات البنزين تستغل السائقين وترفع اسعار السولار رغم ان سعره لم يزداد ولم يتوان السائقون في استغلال الركاب ايضا ورفعوا قيمه اجره الميكروباصات

من نفسهم دون ان يسير ذلك بشكل قانوني وكأننا نعيش عصر الاستغلال الاول

ففي احدى المرات ركبت الميكروباص وكان بجانبي رجل عجوز وسأروي لكم ما دار بين السواق والعجوز

السواق:الاجره جنيه يا جماعه قبل ما نطلع اهو علشان محدش يتكلم معايا

بعدما تحرك الميكروباص الى منتصف الطريق وقام معظم الناس بدفع الاجره التي يريدها السواق وهي الجنيه

رفض الرجل العجوز ان يدفع هذا المبلغ وقال للسواق مش دافع الا 75 قرش انتوا بتزودوا الاجره على مزاجكم

السواق: هو انت مفيش غيرك اللي عملي فيها مفتح وواخدها عافيه يعني مشفتش اليافطه اللي في الموقف

العجوز:اليافطه دي انتوا اللي عاملنها مع نفسكوا كسواقين شغالين بمزاجكوا انتوا

السواق : يابا انت راجل كبير متخلنيش اغلط فيك علشان ربع جنيه

العجوز : احنا نعمل ثوره علشان ننضف البلد وانتوا عايزين تخربوها وبتشتغلوا بمزاجكم

السواق : ادي اللي خدناها من الثوره بتاعتكوا مش لاقيين جاز نمول بيه العربيات

العجوز :هو انتوا كده مش عايزين تنضفوا ابدا عايزين ناس تديكم بالجزمه وبعدين البلد اصبروا عليها شويه هتبقى زي الفل محدش هيسرقها

السواق :هههههههههههههه قال محدش هيسرقها قال عليا الطلاق بالتلاته هيجي واحد يسرقني ويسرقك بعد كده

المهم انا دخلت في المناوشات بين الراجل العجوز والسواق وحاولت استفهم من السواق

طبعا السواق قعد يقولي السولار سعره غالي رغم ان الحكومه مزودتش سعره بس الناس في محطات البنزين والسولار بيرفعوا سعره بمزاجهم وهم بيضطروا لشرائه علشان ميقفش حالهم وقعد يحلف بالطلاق انه عايز يبيع العربيه لانها مش جايبه همها

رديت عليه وقولت له يعني هي فوضى كل واحد شغال بمزاجه

قال لي اه هي فوضى واللي عايز يعمل حاجه بيعملها بمزاجه ومحدش يقدر يتكلم

قالي اشمعنا جايين تتكلموا على السواقين ما الراجل بتاع الفاكهه بيزود سعرها بمزاجه محدش يقدر يتكلم وبتاع الصيدليه بيعلي سعر الدواء وانت غصب عنك تروح تشتريه علشان تخف ومحطات الجاز اللي احنا بنجيب من عندها بتعلي السعر نعمل ايه احنا يعني

قولت له اشتكي الناس دي،قالي انت باين عليك غلبان اشتكي مين يابا هو فيه حد اشتكيله دلوقتي

البلد ماشيه بالبركه..مش عارفين بكره هيحصل ايه

وتستمر المعاناه والامبالاه في عصر ما بعد الغزاه

محمد حمدي الشمسي